近年結婚嘅風氣真係變咗好多，以前講起結婚，大家腦海中浮現嘅一定係大排筵席、朝九晚五嘅接新娘儀式、斟茶、切個五層高 (但其實食唔落) 嘅假蛋糕，仲有企喺佈景板前企定定任人影相嘅男女主角。但對新一代年青人嚟講，呢啲公式化嘅程序唔單止攰，仲有少少似做緊場大龍鳳俾人睇。

而家越來越多新人追求非傳統輕婚禮。咁又係喎，結婚明明係兩個人嘅事，點解唔可以按照自己最舒服嘅方式進行？如果你都準備緊行入人生新階段，或者對傳統婚禮感到窒息，不如睇吓新世代點樣打破常規，為自己嘅大日子添上個人色彩。

「Supper Club」式婚宴：將婚禮變成朋友聚會

以前去飲，最怕就係等開飯。開席遲、上菜慢，新人忙住換衫進場，賓客就坐喺圓枱你眼望我眼，如果你鐘意吹水，對住個陌生人都吹得一餐死嘅都還好，如果你個人比較文靜，呢幾個鐘頭就簡係生不如死。新世代嘅婚禮就打破咗呢種悶局，將婚宴變成好似去咗一間私房菜館或者特色酒吧嘅 「Supper Club」 體驗。

呢種形式唔再需要寫明邊個坐邊張枱，亦冇咗高高在上嘅主家席。現場氣氛極之輕鬆，通常會包下一間有情調嘅小餐廳或者露天花園，大家一邊拎住酒杯，一邊自由行動。食方面，放棄咗繁複嘅鮑參翅肚，換上精緻又方便食嘅特色小食或者充滿驚喜嘅 Tasting Menu。

新人唔使再好似吉祥物咁企喺台上面，而係著住輕便婚紗、波鞋，穿梭賓客之間，可以真正咁同自己嘅朋友傾吓計、飲兩杯、影吓相。呢種婚禮冇咗儀式感，反而多咗一份久違嘅人情味，令婚禮回歸到分享快樂嘅本質。

Introverted ‘I Dos’：屬於內向者嘅浪漫

傳統婚禮基本上係外向者嘅天堂，但對內向者嚟講，要喺幾百個熟同唔熟嘅親戚朋友面前交換誓詞、甚至俾人起哄，簡直係一場公開極刑。因此，近年興起咗一個好溫柔嘅概念——「Introverted ‘I Dos’」（內向者的婚禮）。

越來越多新世代新人選擇旅行結婚。兩個人買張機票，飛去一個一直想去嘅地方，可能係冰島嘅瀑布前，又或者係京都嘅紅葉下，冇觀眾、冇噪音，只有天地同彼此，安安靜靜咁對住另一半講出承諾。呢種只有你同我嘅婚禮，純粹而深刻。

就算要辦實體婚禮，佢哋都會選擇微型婚禮（又或者叫輕婚禮），嚴格控制人數喺 10 到 20 人之內，只邀請最親密嘅屋企人同死黨。冇咗嗰種虛偽客套，每句祝福都係真心真意，唔會再有人一邊比人情你一邊心裡咒罵。內向嘅新人亦可以喺最安心嘅環境下，展現自己最真實、最幸福嘅笑容。

不切蛋糕，改喝共飲調酒

講到傳統婚禮嘅指定動作，一定少不了切蛋糕同合巹交杯。但老實講，個幾層高嘅結婚蛋糕，好多時都只係一件影相道具，最後往往食唔晒造成浪費。

新世代崇尚實用與創意，而家流行將切蛋糕嘅環節，換成極具視覺效果嘅巨大香檳塔，或者由新人喺台上面即場調製一杯專屬嘅Signature Cocktail。

新人會將兩個人嘅故事融入呢杯酒，例如用一隻大家都鍾意嘅基酒，再加入兩個人第一次旅行買嘅茶葉做調味。調好之後，同全場賓客一齊舉杯共飲。呢個舉動唔單止有型、互動性高，仲可以避開切蛋糕嗰種定格影相嘅尷尬，全場一齊Cheers，氣氛即刻 high 爆！

我嘅婚禮，我話事

輕婚禮本質上唔係要叛逆或者反傳統，而係新世代對「尊重自我」嘅一種表達。婚禮唔應該係做比人睇嘅一場show，而應該係小倆口幸福生活嘅起點。

無論係熱鬧輕鬆嘅 Supper Club，還是安靜純粹嘅 Introverted ‘I Dos’，只要能讓身為主角嘅你哋感到自在、快樂，咁就係最完美嘅婚禮。打破常規，卸下繁文縟節，用自己最喜歡嘅方式，去慶祝呢份獨一無二嘅愛情！